ბაიერნი სხვა ლიგაშია - ფრანკფურტის ყოფილმა მწვრთნელმა ბუნდესლიგა გააკრიტიკა

ფრანკფურტის აინტრახტის ყოფილმა დამრიგებელმა, ალბერტ რიერამ, გერმანიის ჩემპიონატის მიმართ საკუთარი იმედგაცრუება არ დამალა და ტაქტიკური თვალსაზრისით ბუნდესლიგა მკაცრად გააკრიტიკა. ესპანელი სპეციალისტის აზრით, ტურნირის საერთო დონე იმაზე ბევრად დაბალია, ვიდრე ეს გარედან ჩანს.

რიერამ აღნიშნა, რომ მიუნხენის ბაიერნი სრულიად განსხვავებულ სიმაღლეზე დგას და მასთან მიახლოება შეუძლებელია, დორტმუნდი საკუთარი ბიუჯეტით სტაბილურობას ინარჩუნებს, ხოლო შტუტგარტი უბრალო სიურპრიზია. მთავარ პრობლემად მან სატურნირო ცხრილის ქვედა ნაწილში მყოფი გუნდები დაასახელა, რომლებიც, მისი თქმით, აბსოლუტურად იდენტურ საფეხბურთო სტილს იყენებენ და ყოველ კვირას ერთსა და იმავე მეტოქესთან შეხვედრის განცდას ტოვებენ.

მწვრთნელმა პარალელი სლოვენიის ჩემპიონატთანაც გაავლო და ხაზი გაუსვა გერმანიაში დახარჯულ მილიონებს, რაც მოედანზე დიდ უპირატესობად არ აისახება. რიერას მტკიცებით, სლოვენიურ ცელიეს ფრანკფურტის აინტრახტთან კონკურენცია თავისუფლად შეუძლია, რადგან რეალური კლასი ორ ქვეყანას შორის იმაზე ბევრად მცირეა, ვიდრე ეს სატრანსფერო ფასებიდან გამომდინარეობს.