ბრაუნი ნახევარდაცვაში? - ბაიერნი ახალ სეზონში მოულოდნელ როტაციას გეგმავს

გასულ სეზონში ბაიერნი შემადგენლობის სიღრმის ნაკლებობის გამო მწვავედ გააკრიტიკეს. როგორც ჩანს, მაქს ებერლმა შეცდომებზე ისწავლა და ამჯერად აქცენტი ფეხბურთელების უნივერსალიზმზე გააკეთა. ამის იდეალური მაგალითი ნათანიელ ბრაუნია.

23 წლის ფეხბურთელი ნომინალური მარცხენა მცველია, თუმცა გერმანული გამოცემების ინფორმაციით, ებერლი მას ნახევარდაცვის ცენტრშიც მოიაზრებს. ლეონ გორეცკასა და რაფაელ გერეიროს წასვლის შემდეგ, მიუნხენელთა შუა ხაზში მხოლოდ კიმიხი, პავლოვიჩი და ბიშოფი რჩებიან. მიუხედავად იმისა, რომ ბრაუნი და კიდევ ერთი ახალწვეული, ისმაელ საიბარი, სუფთა საყრდენები არ არიან, ორივეს აქვს ცენტრში თამაშის გამოცდილება.

შეზღუდული ბიუჯეტის პირობებში, ბრაუნის უნივერსალიზმი ბაიერნისთვის საუკეთესო შანსია, რომ ერთი ტრანსფერით ერთდროულად რამდენიმე პოზიცია დააზღვიოს.