გერმანიამ 2022 წლის მსოფლიო ჩემპიონატზე პირველი მატჩი მცირე სენსაციით დაიწყო - ჰანს ფლიკის გუნდი იაპონიასთან მინიმალური სხვაობით, 1:2 დამარცხდა.
მომდევნო მატჩს, გერმანიის ნაკრები 27 ნოემბერს, ესპანეთის ნაკრების წინააღმდეგ გამართავს - მატჩამდე ორიოდე დღით ადრე კი ლეგენდარულმა გერმანელმა მოთამაშემ, ლოთარ მათეუსმა ის თერთმეტეული დაასახელა, რომლითაც გერმანიის ნაკრებმა უნდა ითამაშოს.
გერმანია (4-2-3-1): ნოიერი - კერერი, ზულე, რუდიგერი, გიუნტერი - გორეცკა, კიმიხი - გნაბრი, გიუნდოგანი, მუსიალა - ფიულკრუგი.
ბევრისთვის მოულოდნელად, სასტარტო თერთმეტეულში ბაიერნის და გერმანიის ნაკრების ლეგენდა, ტომას მიულერი არ მოხვდა, აღნიშნულზე კომენტარი კი თავად მათეუსმაც გააკეთა:
"მიულერმა ჩემი ბოლო საერთაშორისო ტურნირი, ევრო 2000 გამახსენა. მაშინ 2 კვირიანი ტრავმის შემდეგ დავბრუნდი და საკუთარი თამაში ვეღარ ვიპოვე. ახლა ისეთი შთაბეჭდილება მრჩება, რომ მიულერი 100%-ით ფორმაში არ არის. ის იაპონიასთან მატჩში შეხვედრაში აქტიურად ჩაბმული არ ყოფილა", - განაცხადა მათეუსმა.