"ახალი კვარადონა?", - რა მოლოდინებს ამყარებენ გერმანიაში ლუკა პარკაძეზე?

რამდენიმე თვის წინ მიუნხენის “ბაიერნმა” 17 წლის ქართველ ფეხბურთელთან, ლუკა პარკაძესთან გააფორმა შეთანხმება. მაშინ პარკაძე თბილისის “დინამოს” რიგებში ირიცხებოდა, აკადემიის აღზრდილიცაა. ამჟამად ლუკა “გაგრაში” ასპარეზობს და სეზონის ბოლომდე ასე გასტანს. ამის შემდეგ კი მიუნხენშუ წავა.

“ბაიერნს კვარადონას თანამემამულეს მსგავსი თვისებების იმედი აქვს. ლუკა პარკაძე გერმანიის რეკორდსმენის მაისურს 2023 წლის ზაფხულიდან მოირგებს” - წერს Spox.

“ლუკას დიდი ხანია ვიცნობთ და ჩვენი სკაუტები ადევნებდნენ თვალს. გარდა ამისა, მან დიდი შთაბეჭდილება მოახდინა საცდელ სესიაზე აქ, ბაიერნის კამპუსში” - განაცხადა კამპუსის მენეჯერმა, იოხენ ზაუერმა.

როგორც ჩანს, გერმანიაში ლუკაზე დიდ იმედებს ამყარებენ და სწამთ, რომ ქართველი ძირითად გუნდშიც მოახერხებს დაწინაურებას, პარკაძეს ამის პოტენციალი ნამდვილად გააჩნია.